ලාංකීය ටෙලිනාට්‍ය කලාවේ ඉරණම

ලාංකීය ටෙලිනාට්‍ය කලාවේ ඉරණම...

     කාර්ය බහුල දිවිපෙවෙතෙන් විඩාව දුරු කරගැනීමට එක් උපස්ථම්භකයක් ලෙස අප රූප පෙට්ටිය භාවිත කරයි. ඇත්තෙන්ම එමඟින් අපගේ විඩාව දුරු වේද? නැතිනම් තවතවත් අපව විඩාබර කරයි ද? යන්න ගැටලුවකි. වර්තමාන රූපවාහිනී නාලිකා සියල්ලක්ම පාහේ විකාශනය කරන ටෙලිනාට්‍ය පිළිබඳව බැලූවිට සියල්ලම එකම ආරක් අනුගමනය කරන බව පෙනී යයි. ලාංකීය බවින් මිදී විදේශීය නැඹුරුවකට ගමන් කරන බවක් රූපවාහිනීය දෙස බැලීමේදී අපට හඳුනාගත හැකිය.

      විශේෂයෙන්ම ඉන්දියානු සාම්ප්‍රදායට ගරු කිරීමක් ලාංකීය ටෙලිනාට්‍ය තුළ දක්නට ලැබේ. ඇත්තෙන්ම පැරණි ලාංකීය ටෙලි සිත්තම් තුළ තිබූ අපේකම නූතන ටෙලි සිත්තම්වලින් සේදී ගොස්ය. තරගකාරීත්වය හමුවේ අනෙකා පරයා යන හැඟීමෙන් මුසුව රූපවාහිනී නාලිකා මුදල් පසුපස හඹා යන ගමනේදී එක් රුකුලක් ලෙස ටෙලිනාට්‍ය තම දැලට හසුකරගෙන හමාරය. ඉන් නොනැවතුණු ඔවුන් විදේශීය ටෙලිනාට්‍යවලට සිංහල හඬකවා ඒවා ලාංකීය ජනතාවගේ හදවතට ඇද දමනු ලැබීය. එමඟින් ලාංකික ජනයා මත් විය. බොහෝ දෙනා අන් රටවල මිනිසුන් , ඔවුන්ගේ සංස්කෘතිය , සාම්ප්‍රදායිකත්වය අද්‍යනයට සහ නැරඹීමට කැමති වෙයි. එය ඉත්තෙක් කරගත් රූපවාහිනී නාලිකා දිගින් දිගටම විදේශීය නාට්‍ය ලංකාවට ගෙන ඒමට සමත් විය.

       ඉන් බහුතර බලපෑම සිදු වුයේ ඉන්දියානු ටෙලි සිත්තම් තුළිනි. ලාංකීය සමාජ පසුබිමට ඉතාමත් සමීප ඉන්දියානු සමාජ වටපිටාව ලාංකීය ජනයා ඇලුම් කරන්නට විය. එයට ප්‍රේම කරන්නට විය. එමනිසා දිගින් දිගටම ඔවුන් එම ටෙලිනාට්‍ය ඉල්ලුම් කරන්නට විය. මෙමගින් සිදු වූ වියසනය කෙබඳුද? එතෙක් රැකගෙන ආ ලාංකීය අපේකම, අපේ අනන්‍යතාව පහත වැටුණි. ලාංකීය නළු නිළියන්ගේ වටිනාකම, පැවැත්ම හීන විය. ඉන්දියානු අනන්‍යතාවය මෙරට ස්තාපිත විය. රැල්ලට යන සමාජයේ අපත් එක් සාමජිකයෙකු වූ යේ නොදැනුවත්වම ය.

    උදේ , දවල් ,රාත්‍රී යන සෑම අවස්ථාවකදීම රූපවාහිනීය නැරඹූ විට එහි සිංහල වැඩසටහනක් , ටෙලිනාට්‍යයක් විකාශනය වන්නේ අල්ප ප්‍රමාණයකට ය. ඒ තරමටම විදේශීය නිර්මාණ අප රට අරක් ගෙන ඇත. ලාංකීය සමාජයේ දැවැන්ත සම්පත්දායකයන් වෙසෙති. ඔවුන්ගේ හැකියාවන් අපට ප්‍රයෝජනයට ගත හැකි නොවේද? ප්‍රෙක්ෂකයා ප්‍රිය කරනු ලබන්නේ මනදොළ පිනවන වැඩසටහන් නැරඹීමට ය. එහි වරදක් නොමැත. එයට සිදු කළ යුතු වන්නේ විදේශිකයින්ගෙන් උකහා ගත් ඔවුන්ගේ වැඩසටහන් ලංකාව තුළ දිග හැරීම නොවෙයි. එවැනි වැඩසටහන් නරඹා එමඟින් ආදර්ශවත් වී ලාංකීය අපේ සම්පත් ප්‍රයෝජනයට ගෙන එමඟින් නිර්මාණ බිහි කිරීමයි.

     නමුත් අප සිදු කරන්නේ කුමක්ද? අන් රටවල ටෙලිනාට්‍ය නරඹා එහි ඇති ප්‍රෂ්න ,ගැටුම් තුළින් අපගේ මනස පුරවා ගැනීමයි. නිකරුණේ කාලය කා දැමීම යි. වත්මන් ලාංකීය සමාජයේ ටෙලිනාට්‍ය අතික්‍රමණය කරගැනීමට විදේශීය ටෙලි සැණකෙළිය සමත් වී හමාරය. නමුත් අප තවමත් ප්‍රමාද නැත. දැන්වත් සිතන්න. විදේශීය ටෙලිනාට්‍ය හමුවේ නිරුවත් වූ ලාංකීය ටෙලිනාට්‍ය කලාව ගොඩනගා ගැනීමට මෙතැන් සිට වෙහෙසෙමු. එවිට ලාංකීය සමාජයෙන් දුරස් වී යන අපේ ටෙලි සිත්තම් කලාව නව පරපුරට දායක කිරීමට හැකියාවක් ලැබෙනු ඇත.